Hansruedi Giger, u curt HR Giger, pon ins numnar ina legenda da Cuira. Quai di er Patrik Degiacomi, suprastant da la citad a Cuira. El saja in artist da renum mundial ed uschia er in grond ambassadur per la citad. Pelvaira: Cun sia creaziun da la figura Alien per il film cun il medem num dal 1979 è el vegnì enconuschents sin l'entir mund ed ha gudagnà in Oscar per ils megliers effects visuals.
En ils Stadis Unids enconuschan ins duas persunalitads svizras e quai èn Roger Federer e HR Giger.
En sia patria, a Cuira, n'è HR Giger dentant ditg betg stà fitg visibels cun sias ovras artisticas e sias sculpturas. Per la suprastanza da la citad betg supportabel. Uschia ch'ins ha ils ultims onns empruvà da far pli preschents el en la citad. Quai è er gia gartegià cun crear la Plazza HR Giger en la citad veglia u er cun ina tabla d'infurmaziun tar la chasa paterna. Quai onn vul la citad ensemen cun il Museum d'art dal Grischun far il proxim pass e crear in omagi en memoria da HR Giger.
Program durant l'onn da Giger a Cuira
- 3 da matg: Vernissascha dal cudesch «HR Giger – die frühen Jahre 1940-1962» en il Museum d'art dal Grischun
- 16 da matg: Vernissascha da l'exposiziun «HR Giger und die Stadt Chur» en la galleria da la citad – exposiziun fin 11 d'avust
- 12 da settember: Vernissascha da l'exposiziun «Zodiak» en la galleria da citad – exposiziun fin 29 da settember
- 13 da settember: Vernissascha da l'exposiziun «HR Giger – die Churer Jahre» en il Museum d'art dal Grischun – exposiziun fin 24 da november
Il maister da l’art surreal e stgir ha passantà ina gronda part da si'uffanza a Foppa, in’acla si sur Flem. Sur da la vita da HR Giger en ses giuvens onns datti da leger en il cudesch «HR Giger – die frühen Jahre 1940-1962» ch’il schurnalist ed autur Charly Bieler ha realisà ensemen cun sia dunna Mia Bonzanigo. Mia Bonzanigo era pli baud maridada cun HR Giger. Suenter il divorzi ha ella anc ditg lavurà per Giger. L’artist ha surlaschà a sia ex-dunna la chasa da vacanzas.
Pir dal 2016 ha il nov um da Bonzanigo, il schurnalist Charly Bieler chattà sin il palantschin da l’acla a Foppa las fotografias, raquints, l'attest da origin e perfin in tomahawk che HR Giger ha fatg sez. Per Charly Bieler èsi stà cler: I saja stà in stgazi perfetg per scriver in cudesch da las entschattas da HR Giger.
