La Baselgia evangelica refurmada da la Svizra vul far in studi davart l’abus sexual. Per quest intent haja ella inoltrà ina dumonda correspundenta al parlament da la basegia. Quai ha ditg la presidenta da la baselgia, Rita Famos, envers la «NZZ am Sonntag».
Concret giaja per la dumonda nua ch’i dettia abus e quant savens. Il studi duaja prender sut la marella ils secturs «baselgia», «famiglia», «uniuns da sport» e «scolas». Abus saja numnadamain in problem che pertutgia l’entira societad. Tenor Famos custia il studi 1,6 milliuns francs. Il parlament da la baselgia – la sinoda – decidia il zercladur en chaussa, uschia Famos vinavant.
Reacziun sin studi en Germania
Quest studi da la Baselgia evangelica refurmada da la Svizra è ina reacziun sin in studi sumegliant ch'i ha dà en Germania. En il pajais vischin hajan spirituals da la Baselgia evangelica commess millis cas d'abus sexual. Quai resulta d'in studi d'in team da perscrutaders independents che la Baselgia sezza aveva incumbensà. Il studi discurra da 2’225 unfrendas d'abus dapi il 1946, e passa 1’200 delinquents probabels. Las unfrendas sajan quasi tuttas masculinas, e tar 40% dals delinquents sa tractia da plevons.
Questas cifras sajan dentant be la «testa da la muntogna da glatsch», han ditg ils perscrutaders. Per il studi n'han els numnadamain betg pudì evaluar tut ils documents persunals dals plevons e diacons. Ina calculaziun approximativa vegnia sin passa 9'000 unfrendas.
Il december 2023 ha la presidenta da la Baselgia evangelica refurmada da la Svizra, Rita Famos, annunzià envers SRF, ch'era els examineschian schebain e co la Baselgia duai elavurar eventuals cas d'abus sexuals. Ella è sa mussada persvadida ch’i dettia era en sia baselgia blers cas d’abus.
Or da l'archiv
