Las votantas ed ils votants dal cumin Appenzell Dadens han ditg cleramain Gea a la nova constituziun. Igl è l'emprima revisiun totala dapi l'introducziun da la Constituziun il 1872.
Grondas midadas da cuntegn en la Constituziun na dettia dentant betg. Ella saja vegnida surlavurada da la lingua anora, fatga pli precisa e pli survesaivla e tschertas chaussas sajan vegnidas stritgadas che n'èn betg pli necessarias pervia dal dretg federal.
Tuttina hai dà intgina critica or dal cumin. Per exempel che la regenza po decider suletta davart imports pli gronds che fin ussa. U er la nova regulaziun dal dretg d'urgenza – en la constituziun na saja betg previs in termin concret, fin che eventualas regulaziuns stoppian vegnir preschentadas al Cussegl grond (parlament). Ed er il dretg da votar per tuttas e per tuts è vegnì crititgà. Nov dastgan er persunas inablas da giuditgar votar.
Reelegì l'entira regenza
Il cumin dad Appenzell Dadens ha reelegì l'entira regenza dal chantun. Il directur da l'educaziun publica Roland Inauen resta president da la regenza, Roland Dähler resta vicepresident. Singulas candidaturas spontanas n'han gì naginas schanzas.
Monika Rüegg Bless (Allianza dal Center) ha dumagnà sia reelecziun sco scheffa dal departament da sanadad e fatgs socials. Medemamain confermads en la regenza èn vegnids ils schefs da finanzas Ruedi Eberle (PPS) e Jakob Signer (departament da giustia, polizia e militar, senza partida). Plinavant han las votantas ed ils votants danovamain elegì Stefan Müller (Allianza dal Center) sco schef dal departament d’agricultura e selvicultura. Reelegì è era vegnì il schef da construcziun Ruedi Ulmann (Allianza dal Center).
